मोहाडीत 101 मुंडण करुन सरकारचा निषेध...

NEWS15 मराठी प्रतिनिधि - बापू चव्हाण, नाशिक

दिंडोरी : मराठा समाजाला आरक्षण मिळावे यासाठी; राज्यभर विविध आंदोलने सुरु असून, त्यासाठी दिंडोरी तालुक्यातील मोहाडी येथे सकल मराठा समाजाच्यावतीने साखळी उपोषण सुरु केले आहे. काल 101 मराठा आंदोलकांनी मुंडण करून मराठा आरक्षणासाठी रणशिंग फुंकलेल्या मनोज जरांगे पाटील यांच्या उपोषणाला पाठिंबा दिला आहे.

मोहाडी येथे सकल मराठा समाजाच्यावतीने कादवा कारखान्याचे संचालक शहाजी सोमवंशी, मविप्र संचालक प्रवीण जाधव यांच्या नेतृत्वाखाली मोहाडी येथे साखळी उपोषण सुरु केले आहे. या उपोषणाला सर्व पक्ष व जातीतून पाठिंबा मिळत आहे. मोहाडी येथील सकल मराठा समाज पक्षविरहीत एकवटला आहे. यावेळी रोज नव्या आणि कायदेशीर पध्दतीने आंदोलन करण्यात येणार असल्याचे आंदोलकांनी माहिती दिली. मविप्र संचालक प्रवीण जाधव यांच्यासह 101 कार्यकर्त्यांनी मुंडन केले. मराठा आरक्षण घेतल्याशिवाय समाज आता स्वस्थ बसणार नाही. ही लढाई नेटाने लढून आरक्षण पदरात पाडून घेऊ असे मराठा आंदोलकांनी सांगितले.

मराठा समाजाला आरक्षण मिळावे यासाठी; सर्व जाती धर्मातील नागरिकांनी आज पाठिंबा दिला आहे. मोहाडी येथे देखील मनोज जरांगे पाटलांच्या उपोषणाला पाठिंबा देण्यासाठी आम्ही सर्व जण उपस्थित राहुन, शांततेच्या मार्गाने उपोषण करत आहोत. सरकारचे लक्ष वेधण्यासाठी आज आम्ही सर्व जणांनी मुंडण केले आहे. जो पर्यंत मराठा समाजाला न्याय मिळत नाही तो पर्यंत हे साखळी उपोषण कायम चालू राहिल असे प्रवीण नाना जाधव मराठा आंदोलक मोहाडी यांनी म्हंटले आहे.