BREAKING बातमी.! राजकारणात मन रमत नाही म्हणत; निलेश राणेंचा सक्रीय राजकारणातून सन्यास...
News15 Marathi 
NEWS15 मराठी रिपोर्ट - मुंबई
भाजप नेते आणि माजी खासदार निलेश राणे यांनी आज एक मोठा निर्णय जाहीर केला आहे. आपल्या अधिकृत एक्स अकाऊंटद्वारे (पूर्वीचे ट्विटर) वर मी सक्रिय राजकारणातून कायमचा बाजूला होत असल्याचे त्यांनी म्हंटले आहे.
मागच्या १९/२० वर्षा मध्ये आपण सगळ्यांनी मला खूप प्रेम दिलं, कारण नसताना माझ्या सोबत राहिलात त्या बद्दल मी आपला खूप आभारी आहे. भाजपमध्ये खूप प्रेम भेटलं आणि भाजपसारख्या एका उत्तम संघटनेत काम करण्याची संधी मिळाली त्या बद्दल मी खूप नशीबवान आहे. मी एक लहान माणूस आहे पण राजकरणात खूप काही शिकायला मिळालं आणि काही सहकारी कुटुंब म्हणून कायमचं मनात घर करून गेले, आयुष्यात त्यांचा मी नेहमी ऋणी राहीन. निवडणूक लढवणं वगैरे यात मला आता रस राहिला नाही, टीका करणारे टीका करतील पण जिथे मनाला पटत नाही तिथे वेळ स्वतःचा आणि इतरांचा वाया घालवणे मला पटत नाही. कळत नकळत मी काही लोकांना दुखावलं असेल त्याबद्दल मी दिलगिरी व्यक्त करतो. तुम्हा सर्वांना माझ्या शुभेच्छा. जय महाराष्ट्र!, असे नीलेश राणे यांनी आपल्या पोस्टमध्ये म्हटले आहे.
निलेश राणे यांनी अशाप्रकारे तडकाफडकी निवृत्तीचा निर्णय जाहीर केल्याने अनेकांना धक्का बसला आहे. निलेश राणेंच्या ट्विटनंतर राजकीय चर्चांना उधाण आले आहे. निलेश राणे यांनी राजकारणात मन रमत नसल्याचे म्हटले असले तरी त्यांनी हा निर्णय नेमका का घेतला असावा, याविषयी राजकीय वर्तुळात तर्कवितर्क लढवले जात आहेत.
