मोदी सरकारचा संसदेत युटर्न.! 450 रु. मध्ये गॅस देणाचा कोणताही विचार नाही...
News15 Marathi 
NEWS15 मराठी रिपोर्ट - मध्यप्रदेश, राजस्थान, छत्तीसगड, मिझोराम आणि तेलंगणामधील विधानसभा निवडणुकीदरम्यान, भाजपने आपल्या जाहीरनाम्यात LPG सिलेंडरबाबत मोठी घोषणा केली होती. राजस्थानमधील केंद्रातील सत्ताधारी पक्ष भारतीय जनता पक्षाने आपल्या जाहीरनाम्यात पीएम उज्ज्वला योजनेच्या लाभार्थ्यांना 450 रुपयांना सिलिंडर देण्याचे आश्वासन दिले होते. तज्ञांच्या मते, भाजपने मध्यप्रदेशातही असे आश्वासन दिले होते.
तर यानंतर राजस्थान आणि छत्तीसगडमध्ये भाजपला सरकार स्थापन करण्यात यश आले आहे. आता पंतप्रधान उज्ज्वला योजनेच्या लाभार्थ्यांना 450 रुपयांना सिलिंडर मिळणार की नाही, असा प्रश्न उपस्थित होत आहे.
कारण संसदेच्या सध्या सुरू असलेल्या हिवाळी अधिवेशनादरम्यान, सरकारने राज्यसभेत सांगितले की, राजस्थानमध्ये 450 रुपयांना एलपीजी सिलिंडर देण्याचा कोणताही विचार नाही. भारत सरकारने अशी कोणतीही घोषणा केलेली नाही. राज्यसभेत प्रश्नोत्तराच्या तासादरम्यान विचारण्यात आलेल्या प्रश्नाला उत्तर देताना पेट्रोलियम राज्यमंत्री रामेश्वर तेली यांनी ही माहिती दिली.
राज्यसभा खासदार जावेद अली खान यांनी सरकारला विचारले की, सरकारने अलीकडेच राजस्थानमध्ये 450 रुपयांना एलपीजी सिलिंडर देण्याची घोषणा केली आहे का? केंद्र सरकार उत्तर प्रदेशसह संपूर्ण देशात 450 रुपयांना एलपीजी सिलिंडर देण्याचा विचार करत आहे का, असा प्रश्नही त्यांनी सरकारला केला. दोन्ही प्रश्नांची लेखी उत्तरे देताना, पेट्रोलियम राज्यमंत्र्यांनी सांगितले की, अशी कोणतीही घोषणा केली नाही. भारत सरकारकडून राजस्थानमध्ये 450 रुपयांना एलपीजी सिलिंडर देण्याची कोणतीही घोषणा करण्यात आलेली नाही.
