खेड तालुक्यातील ग्रामपंचायत सदस्याची हत्या.! व्यावसायिक वर्चस्वातून हत्या...

NEWS15 मराठी प्रतिनिधी - विश्वनाथ केसवड, पुणे

औद्योगिक क्षेत्र म्हणून अवघ्या राज्यात प्रचलित असलेल्या खेड तालुक्यात; मागील काही दिवसांपासून गुन्हेगारी क्षेत्रात कमालीची वाढ झाली आहे. विविध कारणाने तसेच किरकोळ वादातून याठिकाणी हत्ये सारखे गंभीर गुन्हे गुन्हेगार करत आहेत. तर पुन्हा: अशी एक घटना शुक्रवारी सायंकाळी 7 नंतर घडली असून,  व्यावसायिक वर्चस्वातून ही हत्या झाली असल्याची माहिती समोर आलीय.

मिळालेल्या माहितीनुसार; (पुणे) खेड तालुक्यातील सेझ प्रकल्पात असणाऱ्या कंपन्यामधील व्यावसायिक स्पर्धेतून कनेरसर ग्रामपंचायतीचा सदस्य असलेल्या तरुणाची हत्या करण्यात आली आहे. तर या घटनेनं परिसरात एकच खळबळ उडाली असून, संतोष रामदास दौंडकर - वय ३५ रा. कनेरसर, ता. खेड - असे हत्या झालेल्या ग्रामपंचायत सदस्याचे नाव आहे.

सविस्तर माहितीनुसार; खेड तालुक्यातील सेझ प्रकल्पाच्या दुसऱ्या टप्प्याचे काही प्रमाणात काम सुरू आहे. संतोष दौंडकर यांनी क्रेनचा व्यवसाय सुरू केला होता. त्यामुळे अनेक कंपन्यामध्ये क्रेन पुरविण्याचे काम ते करत होते. अत्यंत कमी कालावधीत त्यांनी व्यवसायात यश मिळवत व्यवसाय वाढवला होता. संतोष हे काल शुक्रवारी सायंकाळच्या सुमारास कंपनीच्या गोडाऊनजवळ असताना अज्ञात हल्लेखोरांनी त्यांच्यावर धारदार हत्याराने वार केले. संतोष यांनी प्रतिकार करण्याचा प्रयत्न केला. मात्र, त्यांच्या हाताचा अंगठा तुटून पडला. हल्लेखोर हल्ला करतच होते. आपला बचाव करण्यासाठी पळत असताना हल्लेखोरांनी त्यांचा पाठलाग करत त्यांच्यावर वार केले. त्यातच त्यांचा मृत्यू झाला. ही हत्या सराईत गुन्हेगारांनी केला असावा, असा अंदाज व्यक्त केला जात आहे. सदर घटनेचा पुढील तपास पोलीस करत आहेत.