खेळाडूंच्या बसला भीषण अपघात.! 4 जणांचा जागीच मृत्यू 1 गंभीर तर 10 जखमी...

NEWS15 मराठी रिपोर्ट - अमरावती

अमरावती जिल्ह्यातून एक धक्कादायक अशी घटना समोर आली आहे. मिनी बस आणि काँक्रिट मिक्सर वाहनाचा भीषण अपघात झाला असून, यात काही खेळाडूंचा मृत्यू तर अनेक जन जखमी झाले आहेत. नांदगाव खंडेश्वरच्या शिंगणापूर फाट्याजवळ हा अपघात झाला आहे. अपघातात 4 जणांचा जागीच मृत्यू झाला, 10 जण गंभीररित्या जखमी झाले आहेत.

अपघातानंतर जखमींना तातडीने नांदगाव खंडेश्वर आरोग्य केंद्रात, तर गंभीर जखमींना अमरावतीच्या रिम्स आणि जिल्हा ग्रामीण रुग्णालयात दाखल करण्यात आले असल्याचे सांगण्यात आले आहे. तर या अपघातात मृतांचा आकडा आणखी वाढण्याची शक्यता वर्तवण्यात आली आहे.

पोलीस प्रशासनाच्या माहितीनुसार; आम्ही तातडीने घटनास्थळ गाठून अपघातग्रस्ताना रुग्णालयात उपचारासाठी हलवले. त्यांच्यावर उपचार सुरू असून 10 जण किरकोळ जखमी, तर चार जणांचा मृत्यू झाला आहे. एकाची प्रकृती गंभीर असून, डॉक्टर सध्या उपचार देत असल्याचे त्यांनी सांगितले. तसंच, या अपघाताला कारणीभूत असलेल्या दोषींवर कारवाई करण्यात येईल, असंही अमरावती जिल्हा ग्रामीणचे पोलीस अधीक्षक विशाल आनंद यांनी सांगितलं.

विविध मैदानी स्पर्धेसाठी 23 खेळाडू यवमाळकडे मिनी बसमधून निघाले होते. त्यावेळी हा अपघात झाला. अमरावती-यवतमाळ रस्ता आणि नागपूर-औरंगाबाद इंटरचेंजजवळ काँक्रिट मिक्सरने मिनी बसला बाजूने जोरदार धडक दिली. त्यामुळे मिनी बस रस्त्याच्या कडेला जाऊन आदळली.