मतदार पुनर्निरीक्षणात दुबार नावे उघड; प्रशासन सतर्क, पडताळणी कडक...

प्रतिनिधी : विश्वनाथ केसवड, खेड

राज्यभर सुरू असलेल्या एस.आय.आर. (मतदार पुनर्निरीक्षण कार्यक्रम) अंतर्गत मतदार नोंदणी व मॅपिंगचे काम वेगाने सुरू असताना अनेक ठिकाणी दुबार नोंदींचा प्रकार समोर आला आहे. विशेषतः ४० वर्षांवरील काही मतदारांची नावे त्यांच्या मूळ गावात आणि सध्याच्या वास्तव्यास असलेल्या ठिकाणी अशा दोन वेगवेगळ्या ठिकाणी नोंद झाल्याचे निदर्शनास आले आहे.

या प्रकारामुळे मतदारांमध्ये गोंधळ निर्माण झाला असून, प्रशासनाने या प्रकरणाची गंभीर दखल घेत पडताळणी प्रक्रिया अधिक कडक केली आहे.

निवडणूक विभागाच्या नियमानुसार एका व्यक्तीचे नाव दोन वेगवेगळ्या मतदारसंघात असणे नियमबाह्य आहे. त्यामुळे अशा प्रकरणांमध्ये एक नाव कायम ठेवून दुसरे वगळण्याची कार्यवाही सुरू करण्यात आली आहे.

 प्रशासनाचे आवाहन

संबंधित मतदारांनी आवश्यक कागदपत्रे सादर करावीत

आपल्या नावाची स्थिती अधिकृत मतदार यादीत तपासावी

आवश्यक दुरुस्ती वेळेत करून घ्यावी

BLO (Booth Level Officer) मार्फत घरोघरी जाऊन माहिती संकलन आणि पडताळणी केली जात आहे. नागरिकांनी या प्रक्रियेत सहकार्य करावे, असे प्रशासनाने स्पष्ट केले आहे.

 या मोहिमेमुळे मतदार यादी अधिक अचूक, पारदर्शक आणि विश्वासार्ह होणार असल्याचे अधिकाऱ्यांचे मत आहे.