महाराष्ट्रात राजकीय नेत्यांची दहशद वाढली? पोलीस निरीक्षकाच्या कॅबिनमध्ये शिंदे गटाच्या नेत्यावर भाजपा आमदाराचा गोळीबार

NEWS1 5मराठी रिपोर्ट - उल्हासनगर

कल्याण : महाराष्ट्रात राजकीय नेत्यांची विशेषत: सत्ताधारी नेत्यांची दहशद वाढली असल्याचे दिसून येत आहे. सत्तास्थापने नंतर मुख्यमंत्री एकनाथ शिंदे यांच्या पदाधीकाऱ्याने सार्वजनिक ठिकाणी एकदा गोळीबार केल्याची घटना समोर आली होती. तर आता उल्हासनगरमध्ये चक्क पोलीस ठाण्यातच दोन नेत्यांमध्ये जोरदार राडा आणि गोळीबार केल्याची धक्कादायक घटना समोर आली आहे. भाजप आमदार गणपत गायकवाड यांच्याकडून गोळीबार करण्यात आला आहे.

धक्कादायक बाब म्हणजे हिललाईन पोलीस स्टेशनमध्ये वरिष्ठ पोलीस निरीक्षकांच्या कॅबिनमध्येच हा गोळीबार केल्या असल्याचे म्हंटले जात आहे. भाजप आमदार गणपत गायकवाड यांनी शिंदे गटाचे कल्याण शहर प्रमुख महेश गायकवाड यांच्यावर गोळीबार केलाय. दरम्यान ठाण्यातील ज्युपिटर रुग्णालयात महेश गायकवाड यांच्यावर उपचार सुरु आहेत.

कल्याणचे शिंदे गटाचे खासदार श्रीकांत शिंदे यांनी महेश गायकवाड यांची रुग्णालयात जाऊन भेट घेतली. दरम्यान कार्यकर्त्यांनी रुग्णालयाबाहेर  मोठ्या प्रमाणावर गर्दी केली आहे.  भाजपच्या गणपत गायकवाड यांनी शिंदे गटाच्या महेश गायकवाड यांच्यावर सहा गोळ्या झाडल्या होत्या. सध्या महेश गायकवाड यांची प्रकृती स्थिर आहे.

मिळालेल्या माहितीनुसार, एका 50 गुंठे जमिनीचा वाद सुरू होता. मागील तीन दिवसांपासून हे प्रकरण सुरू होते. शुक्रवारी गणपत गायकवाड यांच्या मुलांसोबत पोलीस स्टेशनमध्ये वाद सुरु असताना गणपत गायकवाड यांनी  येऊन पोलीस स्टेशनमध्ये गोळीबार केल्याने खळबळ उडाली आहे. 

उल्हासनगरातील हिललाईन पोलीस ठाण्याचे वरिष्ठ पोलीस निरीक्षक विजय जगताप यांच्या कॅबिन मध्ये शिवसेना कल्याण पूर्व शहरप्रमुख महेश गायकवाड आणि त्याचे साथीदार राहुल पाटील व भाजपाचे आमदार गणपत गायकवाड यांच्या मध्ये एका विषयावरून सुरवातीला बाचाबाची झाली. त्यानंतर शिवीगाळ व  गोळीबार झाला. यामध्ये महेश गायकवाड यांना ४ तर राहुल पाटील यांना  २ गोळ्या लागल्या आहेत. यांप्रकाराने खळबळ उडून दोन्ही गटाच्या  समर्थकांनी एकच गोंधळ पोलीस ठाणे व परिसरात घातला. हिललाईन पोलीस ठाण्याचे वरिष्ठ पोलीस निरीक्षक जगताप यांच्या केबिन मध्ये रात्री अंदाजे ११ वाजता गोळीबार झाला असून यापूर्वीही महेश गायकवाड व आमदार गणपत गायकवाड यांच्या  हाणामारी झाल्याचे प्रकार झाले. असे पोलिसांचे म्हणणे आहे.  आमदार गणपत गायकवाड व सुरक्षा रक्षक यांना पोलिसांनी ताब्यात घेतले असून पोलीस अधिक तपास करीत आहेत.